القلب بساط
…………
القلب فارشه بساط
للضحك و الإحباط
ف إجرب لونه و شاط
م المرمغه فوقه
ذق الحزين ضحكته
وقالنا
فوقوا
خبي القمر شوقه
والليل نكد وعياط
ضربت خوفي بأمل في شفشق الخلاط
صبيت عصير الوجع
من دمع عيني كاسات
قلبت في المرتجع
دول كلهم بهوات
يا بخلنين بالود …. جدر الحنين بيمد
والحضن ينشع ورد …. لو صدقت النيات
الحب لو تشحته
قبر الغرام تفحته
قبل الحنين بساعات
الشوق وله لسعات … ولا لسعة الدبابير
د العبد في التفكير … و الرب في التدبير
سرك في قاع البير
هنزل و أجيبهو لك
القول ده مش قولك
امال ده يبقي لمين
دول جملتين كاملين
ما نقصش منهم حرف
ليهم سنين علي الرف
وبشد منهم طرف
جاب الكلام بعضه
وانا ليا مين بعده
غير اني اصون وعده
مهما حصل أو كان
عمرك ما كنت جبان
ليه تقفل الدكان وتجري من العركة
الخوف ده مش مركه
القلب ما بيرجفش
الخوف ده لو شركه م الرعب ما تكدبش
وانت البعيد كداب
والكدب عندك باب
تلقي وراه ابواب …… مسوجره مابتفتحش
فوق لي و ما تسرحش
لتروح في كدبه فطيس
اول ماتبقي جليس للمعر علي غير ريق
تعرف بإن الضيق
و الخنقه
و النرفزه
سكه اللا شئ … في القلش والهزهزه
يا مغرمين أزأزه في السيرة والأحداث
أنا اللي كعب الأذي
في قلبي ضربة فاس
وانا اللي من يوم كذا
القلب فارشه بساط
للضحك والإحباط
فـ إجرب لونه وشاط
م المرمغه فوقه
ذق الحزين ضحكته
وقالنا فوقوا
