مين
… .
ومين يعني اللى خد باله
وحس لوحده بيك وإهتم
و ساب حاله و أحواله
علشان يقسم معاك الهم
ومين بقاك علي نفسه
وشافك أولي ام ضحى
عليل الوحده بيتونس
بصوت أنفاسه والكحة
عددنا كتير عن الاول
گ ان الكفة معدوله
تبص لحظه هتشوفنا
جزر في الدنيا معزولة
لا حاسس باللى بتحسه
ولا شايفك ولا مريت
كتير اخوات وبيتنسيوا
وعايشين تحت سقف البيت
“صباح الخير ” مابنقولهاش
و”أخبارك” ماهيش م القلب
وتسعيرتك نفر ببلاش
وأصبح “الوفاء” للكلب🐕
تغور الدنيا مش طالبه
اعيش فيها غريب مبتور
غيطان الود لو صلبه
ثمارها….. كل زرعة تبور
