من جوا حضن فراقنا هحكيلك
لو صوتي وجّه عينه ع السموات
ف انا جاي اغنيلك
ف الليلة تحديدا ..
بعد الزمان ب زمان
بعد اما اوضتي تنام
من سرد حكاياتي
دلوقتي تحديدا
هحكيلك الأتي ..
عيني اللي دبلت م البكا
ع السير ف ترحالك
خافت تشوفك تتقتل
قتلتني جوا سؤالها عن حالك
اوضتي اللي خافت
تسكن الاحزان حيطانها
تسرق الضلمة ف بيبانها
ولا ينقص يوم نفسها
حذرتني كل ليلة
لما كنت احكيلها عنك
كات بتقفلي ف ودانها
طب هعمل ايه !؟
طب عاملة ايه ؟!
بالمناسبة قلبي عندك ابعتيه
ع الاقل يخف حبة م الضحايا
مش عدالة ي حلوة يعني
يبقي اوضتي
وذكرياتنا
وصوت عيالنا ع الحيطان
واقفين معايا بنتقتل علشان غيابك
واربي بابك ..
مدي ايدك والحقينا
كل حلم عاش ما بيننا
مرسوم قصادي ع الحيطان
عمال يجرب الانتحار
ولكنه افشل م الفشل
الذكريات ..
بتحوم بريحتك ف المكان
قاصدة تقتل كل حاجة
كل مرة نقول هننسي
تعدي صورتك لما يومها الليل يزورنا
طب هعمل ايه ؟!
لما نيلك فجأة يقطع ريه عني
لما هبني الكون بحاله
لجل اطولك فوق سمايا
فجأة الاقي الكون هاددني
لما بابك وحده لازم يتفتحلي
واجي ازورك يومها عادي
والقى بابك قام راددني
لو طبيعي نعيش حياتنا
دون م تبقِي ليلة بيينا
خلي قلبي جنب قلبك
رغم كون قلبي واحشني
#حضن_الفراق
بقلم -مصطفي رضا